කෘත්‍රිම ශරීර කොටස් නිර්මාණය කිරීම සදහා අළුතින් ස්ථාපනය කෙරුණු ත්‍රිමාණ මුද්‍රණාගාරය සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා අතින් අද (10) පෙරවරුවේ ජනතා අයිතියට පත් කෙරිණි. හදිසි අනතුරු සහ විකලාංග ඒකකයට අනුබද්ධව ක්‍රියාත්මක මෙම ත්‍රිමාණ මුද්‍රණාගාරය පිහිටා ඇත්තේ විකලාංග සායන පරිශ්‍රයේ යි.

ලෝක සෞඛ්‍ය සංවිධානය හදුන්වා දී ඇති උපකාරක තාක්ෂණවේදය අනුගමනය කරමින් එම වැඩපිළිවෙලට සහාය දැක්වීම සඳහා මෙම නව ඒකකය ස්ථාපනය කෙරිණි. අද විවෘත කෙරුණු ත්‍රිමාණ මුද්‍රණ යන්ත්‍රයේ පරිලෝකන කොටස (Scanner) හැරුණු විට අනෙක් සියලු කොටස් සහ එහි වැදගත්ම කොටස වන මෘදුකාංගය ද ශ්‍රී ලංකාවේම නිෂ්පාදනය වීම විශේෂත්වයක්. කෘත්‍රීම අත් පා සහ අනෙකුත් ශරීර කොටස් වලට අමතරව ඇතැම් වෛද්‍ය උපකරණ ද මෙම යන්ත්‍රය මගින් නිෂ්පාදනය කර ගැනීමේ හැකියාව ඇත.

1950 දශකයේ සිට ඊයේ වනතුරුම පැරිස් බදාම (Plaster of Paris) ආධාරයෙන් නිෂ්පාදිත අච්චුවකින් මෙම කෘත්‍රිම අවයව නිර්මාණය සිදු කරන ලදී. අද දින විවෘත කෙරුණු ත්‍රිමාණ මුද්‍රණාගාරය මගින් අදාළ රෝගීන්ට සුවිශාල සේවාවක් සැපයෙනු ඇති. රෝගීන් වෙත තම සිරුරට 100% ක්ම ගැළපෙන අවයවය මෙමගින් නිර්මාණය කර ගත හැකිය. මින් පෙර භාවිත කළ තාක්ෂණයට වඩා ඉතා උසස් තාක්ෂණ ක්‍රමවේදයක් මෙහිදී අනුගමනය කෙරේ. පැරිස් බදාම මගින් මෙම නිර්මාණය සිදු කරන්නේ නම් ගත වන කාලය සති 3 කට අධිකයි. නව ත්‍රිමාණ මුද්‍රණාගාරය මගින් සිදු කරන එක් නිර්මාණයක් පැය 4 ක වැනි කාලයකින් සම්පුර්ණ කර ගැනීමේ හැකියාව පවතී.

සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතාගේ ප්‍රධානත්වයෙන් පැවති මෙම අවස්ථාවට සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ, ජාතික රෝහලේ නියෝජ්‍ය අධ්‍යක්ෂ ජනරාල් වෛද්‍ය කුමාර වික්‍රමසිංහ, නියෝජ්‍ය අධ්‍යක්ෂ වෛද්‍ය ලයනල් මුහන්දිරම්, හදිසි අනතුරු අංශ‌යේ නියෝජ්‍ය අධ්‍යක්ෂිකා වෛද්‍ය සමින්දි සමරකොන් යන මහත්ම මහත්මින් මෙන්ම විකලාංග ඒකකයේ නිළධාරීන් පිරිසක් ද මෙම අවස්ථාවට එක්ව සිටියහ.

LEAVE A REPLY

Please enter your comment!
Please enter your name here